Дом у цэнтры горада, дзе размешчаны кнігарня "Крыніца" з боку вуліцы выглядае цалкам сабе прыстойна. Але такое адчуванне імгненнем знікае, калі заходзіш у двор. Вялікая безгаспадарная тэрыторыя са здзічэлымі запушчанымі кветнікамі, паўразбуранымі рэшткамі былых спартыўных збудаванняў і хаатычная паркоўка аўтамабіляў проста на траве.
У рэшце рэшт жыхарам такое становішча спраў надакучыла. 2 красавіка амаль 70 жыхароў выйшлі на сход, каб перадаць Аршанскім камунальным службам свае прапановы па рамонце двара. Праект плана яшчэ трэба ўзгадніць з зацікаўленымі арганізацыямі - газавікамі, водаканалам, электрасеткамі, сувязістамі і г.д. На сходзе абралі адказных асоб ад кожнага з васьмі пад'ездаў дома.Чыноўнікі пакуль сур'ёзных абяцанняў даваць пабойваюцца, аднак жыхары дома настроены рашуча і маюць намер дамагацца работ па добраўпарадкаванні. Бо пад ляжачы камень вада не цячэ.
