Наш сайт раней інфармаваў пра тое, што ў цэнтры горада пабудавалі міні-аўтастанцыі з абодвух бакоў. Цяпер людзі мусяць набываць квіткі на прыгарадныя аўтобусы ў вакенцах касаў. Нічога не выклікала вялікіх пытанняў да таго моманту, пакуль людзі не пачалі масава ездзіць. На выходных мноства аршанцаў адправіліся на могілкі да сваякоў, каб прыбраць там перад святам Радаўніцы. Аднак сутыкнуліся з праблемамі, аб чым сведчыць адзін з прыкладаў, які неабыякавыя гараджане і вяскоўцы даслалі ў нашу рэдакцыю.

Дзясяткі людзей таўкліся на прыпынку каля гарадскога парку ў чаканні сваёй чаргі на аўтобус Орша - Дуброўна. Усе набылі квіткі на аўтобус, ды і сам транспарт ужо прыбыў на станцыю, аднак, нягледзячы на наяўнасць кантралёра ў салоне аўтобуса, квіткі правяраў яшчэ адзін кантралёр перад першымі дзвярыма. А іншыя дзверы былі зачыненыя. Толькі пасля праверкі квіткоў, людзей запускалі ў аўтобус, прычым праз вузкія дзверы ў пачатку салона. Гэта справакавала таўканіну не толькі ў самім аўтобусе, але і на прыпынку, куды прыязджалі маршрутныя таксі і аўтобусы гарадскога злучэння. Апафеёз дзеі быў у тым, што ўжо ў дарозе да Дуброўны кантралёр усё адно хадзіў па аўтобусе і запытваў, хто яшчэ не аплаціў праезд. Адсюль пытанне: навошта рабіць праверку квіткоў на ажыўленым прыпынку ў самым цэнтры Оршы, павышаючы рызыку аварый, затораў і боек, калі "абілечванне" можна здзейсніць па дарозе ў самім салоне, як гэта заўсёды робіцца на гарадскіх маршрутах? Іначай, навошта было будаваць аўтастанцыю і прадаваць там квіткі на аўтобусы? Варта ўлічыць і тое, што чым бліжэй лета, тым больш людзей будуць карыстацца прыгараднымі маршрутамі. Жыхары Ларынаўкі, Брылёў, Гацькаўшчыны, Крапіўны, Дуброўны нярэдка бываюць у Оршы, а многім жыхарам Оршы неабходна ездзіць да бацькоў у тыя і іншыя вёскі альбо на ўласныя лецішчы. Калі праблему не вырашыць у бліжэйшыя дні, гэта можа прывесці да трагедыі, - баяцца жыхары.