Аршанскія чайкі не настолькі нахабныя як птушкі ў іншых вялікіх гарадах - яны не выклянчваюць ежу з рук у людзей. Чайкам, якія спыніліся ў нашым горадзе даводзіцца паляваць на рыбу, але цывілізацыя прыйшла і ў іх жыццё і створаны людзьмі аб'ект яны на поўную выкарыстоўваюць для здабычы ежы.
Зручнае месца для палявання чаек - плаціна каля Шыпучага маста. Тут рыба не можа сыйсці на дно ці схавацца дзесці яшчэ, таму чайкам не патрэбна ні лётаць каб высачыць здабычу ні ныраць за ёй. Чайкі выбралі іншую тактыку - яны стаяць на плаціне і чакаюць пакуль дробная рыба (вялікую, якая не праходзіць у клюў яны не кранаюць) сама праплыве міма іх. Птушцы трэба толькі своечасова схапіць рыбіну ў рот і не выраніць яе з клюва.
Такім чынам птушка можа прастаяць на плаціне хоць цэлы дзень, няма патрэбы, нават, выходзіць са свайго ўчастка палявання, які складае не больш за 2 квадратных метры.
