На момант аварыі - вечарам 5 ліпеня - прэзідэнт ужо пакінуў Александрыю на верталёце, а картэж аховы вырушыў па трасе Шклоў - Орша ў бок Оршы. У гэты ж час кампанія маладых, але ўжо сямейных людзей разам з дзецьмі накіроўвалася на чатырох аўтамабілях у бок Александрыі дамоў пасля адпачынку на Шчацінкаўскім возеры. Недалёка ад вёскі ў якую ехала кампанія і адбылося здарэнне. Па словах відавочцаў, картэж аховы прэзідэнта ехаў на хуткасці яўна большай чым дазволена на гэтым учатску дарогі, але без суправаджэння ДАІ. З-за асаблівасці ландшафту - тут дарога робіць пад'ёмы і спускі - кампанія не паспела своечасова заўважыць чорныя аўтамабілі прэзідэнцкай службы.

Маладыя людзі былі вымушаны тармазіць вельмі хутка ужо звярнуўшы на збочыну. Ад гэтага на відэа бачны шлейф пылу, які асабліва бачны за другім з чатырох аўтамабіляў кампаніі. Апошнім аўтамабілем кіравала не дасведчаная 23-гадовая дзяўчына. Як распавялі нашаму сайту знаёмыя гэтай дзяўчыны, пры рэзкім тармажэнні па пяску яе аўтамабіль пачало засоніць і выкінула на сустрэчную паласу проста пад колы Мэрсэдэса Спрынтар. У БМВ якім кіравала дзяўчына спрацавалі падушкі бяспекі (следчы камітэт паведамляе, што ў машыне ехала 6 чалавек) і таму акрамя яе самой ніхто ў машыне не пацярпеў. А аўтамабіль аховы прэзідэнта пачаў куляцца і куляючыся праляцеў парадку ста метраў. Па дарозе рассыпаліся не толькі запчасткі Мэрсэдэса, але і зброя, якая з яго выпадала. У выніку дарога была перакрыта не толькі для разбіральніцтва, але і для збору зброі. Пасля здарэння дзяўчына (яна мае мужа і малога сына) была шпіталізавана. Трое супрацоўнікаў аховы таксама знаходзяцца ў бальніцы, два з іх у даволі цяжкім стане.

Аршанскія следчыя ўздыхнулі з палёгкай, калі стала вядома, што крымінальную справу па факце аварыі перадалі ў Мінскі следчы камітэт.

На відэа: момант аварыі зняты відэа рэгістратарам пацярпелага аўтамабіля аховы прэзідэнта