Пра наш горад напісалі вядомая і папулярная "Комсомольская правда" і вядучае спартовае выданне Беларусі - "Прессбол". Абодва выданні пісалі пра турыстычныя, прывабныя месцы Оршы, але з папраўкай на сваю спецыфіку і мэтавую аўдыторыю.
Аўтар "Прессбола" Андрэй Вашкевіч нечакана звярнуў увагу на падвесныя масты, якія рэдка наведвае абсалютная большасць аршанцаў. Таксама карэспандэнт апісаў атмасферу вакол футбола і на ім. Паказаў трыбуны, на якіх сапраўды сабралася шмат людзей, іх паводзіны. А таксама сфатаграфаваў чэк - сціплы шматочак паперы, які ў Оршы замяняе квіток на футбольны матч. У іншых гарадах квіток як правіла каляровы і якасны.
Журналістка "Камсамолкі" Вольга Івашэнка прайшлася па амаль тысячагадовай гісторыі Оршы з дапамогай апісання славутасцяў. Так, напрыклад, яна прыгадала паданне, згодна з якім у 1902 годзе, пры пабудове вадзянога млына на цяперашняй вуліцы Замкавай, падмурак будучага млына акрапілі крывёй, на шчасце, каб млын рэгулярна прыносіў прыбытак.
