Байкерскі клуб "Начныя ваўкі" існуе ў Расеі ўжо шмат гадоў і карыстаецца інфармацыйнай і фінансавай падтрымкай ураду Расейскай Федэрацыі. Летась і сёлета "НВ" ладзяць мотапрабег на Берлін у знак перамогі СССР у 2-й Сусветнай вайне. Але мотапрабег заўжды суправаджаецца шавіністычнымі заявамі яго ўдзельнікаў, асабліва лідэра Аляксандра Залдастанава. Напярэдадні ён заявіў, што лічыць Беларусь і Украіну часткамі Расеі. Пры гэтым, нягледзячы на відавочны расейскі шавінізм, паездка "Начных ваўкоў" не сустракае адпору ў беларускіх дзяржаўных арганізацый, а актывісты БРСМ нават сустракалі расейскіх шавіністаў з кветкамі.
Польскія памежнікі рэзонна не пусцілі экстрымістаў у Польшчу, цяпер яны вымушаныя вяртацца ў Маскву праз Беларусь. А гэта значыць затрымаюцца ў нашай краіне. Паводле непацверджанай пакуль інфармацыі, "пуцінскія байкеры", як іх яшчэ называюць, прыедуць у некалькі беларускіх гарадоў, у тым ліку і ў Оршу, якая ляжыць якраз на іх шляху ў Расею.
