Перад 9 мая ў шэрагу расійскіх СМІ з'явілася інфармацыя, што беларускія ўлады "рэкамендуюць не выкарыстоўваць" пад час святкаванняў так званыя георгіеўскія стужкі. Інфармацыю гэтую не падцвердзіў аніводны высокапастаўлены чыноўнік, але па факту, сапраўды, іх выкарыстанне дзяржаўнымі ўстановамі было значна скарочана. Хаця дзе-нідзе георгіеўскія стужкі праскоквалі, у тым ліку і ў Оршы.
Так, з адмысловымі сцяжкамі пасля некаторага перапынку ў Оршу вярнуліся глуханямыя прадаўцы. 9 мая каля гарадскога рынку двое маладых людзей прадавалі чырвоныя сцягі з выявай ордэна ў аздабленні георгіеўскай стужкі.
Каля мітынгу 9 мая мужчына і жанчына бясплатна раздавалі стужкі, якія многія чаплялі сабе на вопратку. Дарэчы, раней гэты чалавек які раздаваў стужкі быў вядомы ў Оршы як арганізатар рускіх прабежак (або славянскіх прабежак). А некалькі меяцаў таму ў сацыяльных сетках зноў ўсплыў фотаздымак дзе гэты чалавек фатаграфуецца на прыступках Аршанскага выканкаму з сябрамі, у руках аднаго з "сяброў" сцяг расійскай імперыі.
У гандлёвых шэрагах на асноўным святкаванні георгіеўскія стужкі сустракаліся рэдка, але не абыйшлося і без іх - найбольш яскрава выкарыстала чорна-аранжавыя колеры Аршанскае РайПО.
А ў педагагічным коледжы акрамя георгіеўскай стужкі ў святочным плакаце выкарысталі яшчэ і галоўны сімвал сталіцы суседняй дзяржавы - крэмль.
Хаця сёння гэтая стужка чорна-аранжавых колераў называецца георгіеўскай, яе правільная назва - гвардзейская. Георгіеўская стужка - чорна-жоўтага колеру. Гвардзейскія колеры, сапраўды, выкарыстоўваліся ў часы Другой Сусветнай вайны савецкім войскам, тады як георгіеўскія колеры выкарыстоўваліся для ўзнагародаў у калабаранцкім руху, у пырватнасці, у Рускім вызвольным войску, якое ваявала пад камандаваннем генерала Ўласава на баку фашыстаў. Пасля ўзброенага канфлікту ва Ўкраіне гэтая стужка стала боьш асацыявацца з Расійскім імперыялізмам і агрэсіяй.
