Для аршанскага суда гэта, сапраўды, працэс унікальны. Больш за сотню пацярпелых з розных рэгіёнаў краіны, якія будуць дапытаныя, пры тым, што гэта не ўсе пацярпелыя ад дзеянняў злачыннай групоўкі. У першы дзень нікога дапытаць не атрымалася - слухаліся пісьмовыя матэр'ялы справы.
З чатырох, патрапіўшых пад суд маладзёнаў, толькі адзін у залі суда знаходзіцца пад вартай - за адмысловай агароджай - гэта лідар злачыннай групы. Астатнія трое сядзяць у залі на першым шэрагу без варты, хаваючы твары ад журналістаў - яны пад падпіскай аб нявыездзе.
Нагадаем, што траіх аршанцаў і аднаго мінчаніна судзяць у Оршы па абвінавачанні ў тым, што яны вымагалі ў карыстальнікаў інтэрнэту грошы ад імя міліцыі і КДБ. Для гэтага абвінавачаныя стварылі праграму вірус, якая блакавала работу кампутараў, быццам бы, па прычыне таго, што карыстальнік глядзеў парнаграфію. Акрамя жыхароў Оршы і Мінска, у злачынную схему былі замяшаныя і жыхары Расіі, але супраць іх распачалі асобную справу.
