На "загавораным" пешаходным пераходзе ў Бабінічах усё ж такі усталявалі асвятленне. За гэты год на адным з пешаходным пераходаў у Бабінічах - каля прыпынку ЭПО - адбыўся шэраг наездаў на пешаходаў. Толькі за апошнія два месяцы такіх наездаў было, як мінімум, два. Адзін з іх скончыўся трагічна - пацярпела сямейная пара. У той аварыі мужчына загінуў, а жанчына засталася інвалідам. Літаральна на мінулым тыдні адбыўся другі наезд на пешахода, у якой ад інкасатарскай машыны пацярпеў 15-гадовы юнак.
Канешне, такія частыя ахвяры сярод пешаходаў не пакінулі безабыякавымі мясцовых жыхароў. Нехта палічыў, што пешаходны пераход "загаварылі", па меркаванні іншых прычына больш банальная - пешаходны пераход быў неасветлены. Гэтая праблема таксама абмяркоўвалася на круглым стале, прысвечаным пытанню бяспекі на дарогах у Аршанскім раёне. Ён адбыўся 21 лістапада. З просьбай паставіць на дарозе асвятленне жыхары Бабінічаў звярталіся ў выканкам. Нарэшце, на гэтым тыдні уздоўж трасы, якая праходзіць праз Бабінічы, пачалі ўсталёўваць слупы асвятлення.
