Ліпень меў няшмат запамінальных падзеяў, затое падзеі гэтыя былі вельмі яскравымі. У гэтым месяцы распачаўся збор подпісаў за вылучэнне кандыдатаў у дэпутаты. І на вуліцах горада зноў з'явіўся бел-чырвона-белы сцяг. На пікетах з нацыянальным сцягам подпісы збіралі сябры Партыі БНФ, якія на гэты раз ішлі па ўсёй краіне без удзелу ў рэспубліканскіх кааліцыях, па аршанскіх акругах былі вылучаныя два кандыдаты, з іх зарэгістраваны толькі адзін. Абвесціў пра сваё вылучэнне ў кандыдаты і стаўшы ўжо знакамітым старэйшына вёскі Стаўры Ігар Грышанаў. Па тых кандыдатах, якія абвесцілі пра свой намер балатавацца, чакалася, што выбары будуць яскравымі і будуць насычаныя цікавымі падзеямі, актыўнай агітацыяй і г.д. Але да рэгістрацыі кандыдатаў выбарчыя камісіі, складзеныя, як звычайна, без іншадумцаў, падыйшлі традыцыйна выбарачна. Кампанія атрымалася, як і ранейшыя, сумнай і амаль незаўважнай для шырокай публікі. Вынікі выбараў таксама не былі нечаканымі, прынамсі, па аршанскіх акругах.
Вялікую ўвагу прыцягнула бяспека дзяцей у рэгіёне. У Дубровенскім раёне патануў 9-гадовы хлопчык, а ў Оршы ў ліпені з вакна звалілася дзіцё. Прычым, гэта было першае такое падзенне, за год некалькі дзяцей выпадуць з вокнаў кватэраў.
У гэтым месяцы краіна перажыла дэнамінацыю. І не без цяжкасцяў, у рэгіёне было зафіксавана шмат выпадкаў махлярства з новымі капейкамі. Часцей за ўсё махляры карысталіся неўважлівасцю сваіх ахвяраў і падсоўвалі ім грошы меньшым наміналам, або ўвогуле савалі расейскія капейкі, якія сталі ў разы танней за беларускія.
У гэтым жа месяцы мясцовыя ўлады забаранілі наведванне лясоў з-за пажарнай небяспекі - ліпень 2016-га быў сухім і вельмі спякотным, як жа прыемна гэта ўзгадваць 10-га студзеня 2017-га!
Непрыемнасці працягваліся ў аршанскага "Экамола". Хаця ў ліпені быў выпушчаны ўладальнік кампаніі, Расія ў ліпені адмовілася закупаць прадукцыю нашага прадпрыемства.
Для грамадскай сферы гэты месяц таксама быў яскравым - поўнай хадою ішоў турнір па дваровым футболе, а ў Чарнігаве аршанскае АМГА "Звяз" арганізавала цэлы вечар у рамках мясцовага буйнога фестываля "Зялёная сцэна".
Але самай яскравай і запамінальнай падзеяй стаў прайшоўшы праз Оршу ўраган. Толькі выпадкова ўраган не прынес чалавечых ахвяраў, затое паламаў шмат дрэваў і дамоў. Менавіта пасля яго ўладам давялося разабраць будынак музея Заслонава, які даўно патрабаваў рамонта.
