У Воршы працягваецца збор подпісаў за адмену Дэкрэта № 3 "Аб сацыяльным утрыманстве", які часта ў народзе называюць "падаткам на дармаедаў". Праваабаронца Васіль Бераснеў упэўнены, што Дэкрэт нельга называць законным, і ў цяперашні час, калі тысячы людзей жадаюць уладкавацца на працу, але не могуць зрабіць гэтага з-за адсутнасці вакансій па сваёй спецыяльнасці, збіраць такі падатак недарэчна. Па словах Васіля Бераснева, праблема датычыцца не вузкага кола грамадства, а практычна кожнага жыхара Беларусі і Аршаншчыны ў прыватнасці. Напрыклад, вайскоўцу, які дэмабілізаваўся паўгады таму, складана ўладкавацца, бо Міністэрства абароны не дае накіраванняў на працу. Шмат людзей суперажываюць студэнтам, якія яшчэ не маюць стажу і ім складана знайсці працу для сябе. Плюс да ўсяго, працягваюцца скарачэнні на прадпрыемствах. Людзі звяртаюцца да зборшчыкаў подпісаў і нават самі бяруць падпісныя аркушы, каб сабраць яшчэ болей. Дзеля гэтага некаторыя грамадзяне адмыслова прыязджалі ў Оршу з іншых гарадоў Аршанскага, Дубровенскага, Талачынскага раёнаў.
Старшыня прафсаюзу РЭП у Оршы Аляксандр Булаўка лічыць, што сабраць некалькі тысячаў подпісаў цалкам рэальна. Па-першае, многія прыязджаюць у Оршу з навакольных вёсак і болей далёкіх населеных пунктаў, каб паведаміць пра сваю праблему з уладкаваннем на працу, па-другое, людзям не даводзіцца доўга тлумачыць, чаму гэта важна - неабходнасць паставіць свой подпіс за адмену Дэкрэта № 3 разумеюць вельмі многія грамадзяне. Па-трэцяе, пашыраецца інфармацыя пра людзей, да каго можна звярнуцца і падпісацца.
20-га лютага ў Менску запланаваны Марш недармаедаў, пасля якога ўсе сабраныя па краіне, у тым ліку Аршаншчыне, подпісы будуць перададзеныя ў Палату прадстаўнікоў Нацыянальнага сходу, Савет Рэспублікі, Адміністрацыю прэзідэнта.
Напярэдадні мы публікавалі нумары зборшчыкаў ад партыі АГП, які збіраюць подпісы за адмену Дэкрэта № 3. Вось нумары прадстаўнікоў прафсаюза РЭП, якія займаюцца зборам подпісаў альбо могуць пракансультаваць грамадзянаў па пытаннях, звязаных з гэтым:
Булаўка Аляксандр Мацвеевіч 614 05 16; 8(016) 51-18-91;
Бераснеў Васіль Ціханавіч 712 57 55;
Масалкоў Аляксандр Анатольевіч (юрыст) 711 51 17.
