17-га чэрвеня на Паклоннай гары ў Маскве стартуе першы бронепрабег Расеі і Беларусі. У ім возьмуць удзел болей за 15 адзінак дэмілітарызаванай тэхнікі, якая праследуе па маршруце Масква — Адзінцова — Галіцына — Мажайск — Вязьма — Смаленск — Орша — Барысаў — Менск — Баранавічы — Кобрын — Берасце. Удзельнікі бронепрабегу ўсталююць рэкорд Расеі, гэта будзе самы доўгі кідок на бронетэхніцы, які калі-небудзь рабіўся. Сябры бронепрабегу 22-га чэрвеня даедуць да Берасця.
Арганізатар акцыі "Дарога мужнасці" — расейскае ваенна-тэхнічнае таварыства, акцыя заклікана ўшанаваць памяць палеглых на палях вайны людзей. Бронепрабег пакрые 2 300 кіламетраў, а ўдзельнікі возьмуць удзел у 20 памятных мерапрыемствах на тэрыторыях Расеі і Беларусі.
У апошнія гады на афіцыйным узроўні рэгулярна ладзяцца мота- велапрабегі ў памяць аб ІІ Сусветнай вайне на тэрыторыі СССР. Цяпер у спіс дадаўся яшчэ і бронепрабег. Часам падобныя акцыі выклікаюць скандалы, як, да прыкладу, "мотаадысея" скандальнай прапуцінскай арганізацыі "Начныя ваўкі", часам праходзяць без эксцэсаў.
