Адна з самых вядомых рэкаў Аршаншчыны сёння выглядае як сціплы ручай, які працякае па вялікім рэчышчы са стромкімі берагамі. Толькі берагі і захаваўшаяся назва манастыра, здаецца, і засталіся ад ракі. Пытанне добраўпарадкавання гэтага берага ды выратавання самой ракі падымалася і раней, але так супала, што гэтай вясной адразу некалькі арганізацый загаварылі пра праблему амаль адначасова.
Так, 1-га чэрвеня грамадская ініцыятыва "чысты свет" па ініцыятыве Алены Кучынскай, правяла ва ўрочышчы ракі дзіцячае свята прымеркаванае да "Дня абароны дзяцей". Такім чынам актывісты і прыцягнулі ўвагу да праблемы ракі і прадэманстравалі рэкрэацыйны патэнцыял урочышча. На думку актывістаў, стварэнне ва ўрочышчы рэкрэацыйнай зоны - гэта адна з магчымасцяў вырашыць праблему ракі.
5-га чэрвеня на аграсядзібе "Пуцяніна", па ініцыятыве аднаго з рэгіянальных каардынатараў кампаніі "Гавары праўду" Ігара Грышанава, сябраліся яшчэ шэраг актывістаў з розных арганізацый, якія больш падрабязна абмеркавалі праблему Куцеенкі і запланавалі шэраг мерапрыемстваў па гэтым пытанні. Дарэчы, 5-га чэрвеня - міжнародны дзень навакольнага асяроддзя, які дэмакратычныя арганізацыі вырашылі адзначаць штогадова. Некаторыя вынікі абмеркавння былі перададзеныя новаму старшыні выканкаму Леаніду Пянькоўскаму на яго прыёме грамадзянаў у Бабінічах.
15-га чэрвеня актывісты - Алена Кучынская і Ігар Казмерчак - па пытанні Куцеенкі наведалі райвыканкам, дзе сустрэліся з намеснікам старшыні выканаму Алегам Смірноўскім. Як высветлілася, і ў выканкама ёсць свай погляд на праблему і планы па яе вырашэнні, які прынцыпова не адрозніваецца ад погляду грамадскіх ініцыятываў. Адпаведна, пры рэалізацыі гэтых планаў грамадскасць і ўлады змогуць працаваць супольна. А першы вынік па супольным вырашэнні праблемаў Куцеенкі ўжо з'явіўся - грамадскія актывісты выявілі ва ўрочышчы зарасці баршчавіка, якія ўжо сёння адмысловымі службамі былі знішчаны.
