Былы кар'ер, які пераўтварыўся ў возера Шчацінкаўскае - самае папулярнае месца летняга адпачынку сярод аршанцаў. Тут у сонечныя выходныя збіраюцца да тысячы чалавек, але дабірацца да яго заўсёды даводзілася самастойна (або ўласным траспартным, або пешкам). У гэтым годзе па новай дарозе, якая прайшла каля возера быў запушчаны аўтобусны маршрут №13. Стваральнікі маршрута адразу не прадугледзілі прыпынку каля возера, а цяпер гэта стала праблемай кіроўцаў аўтобуса №13.
Амаль аніводны праезд аўтобуса міма кар'ера не абыходзіцца без просьбаў ад пасажыраў прыпыніць каля Шчацінкаўскага. У выніку, гэта стала раздражняць кіроўцаў - спыняцца не на прыпынках правіламі забаронена. Цяпер аўтобус ездзіць з надрукаванай аб'явай, якая тлумачыць, што аўтобус каля кар'ера прыпыніцца не можа, а пасажырам прапаноўваецца звяртацца ў райвыканкам з просьбамі зрабіць патрэбны ў летні перыяд аўтобусны прыпынак.
