30 ліпеня ў Балбасаве прагучаў стрэл — 44-гадовы непрацуючы мужчына стрэліў у сваю 42-гадовую знаёмую. Паводле папярэдняй версіі, злачынства адбылося на глебе рэўнасці, а мужчына быў на падпітку. Прычым стрэл прагучаў у 7:45 у пад’ездзе, яго маглі чуць многія людзі. Жанчына была тэрмінова шпіталізавана ў рэанімацыйнае аддзяленне бальніцы. А “стралок” збег з месца злачынства.
Праваахоўныя органы аператыўна паднялі сваіх супрацоўнікаў на пошукі злачынцы, па трывозе паднялі супрацоўнікаў пяці суседніх з Аршанскім раёнаў Віцебскай вобласці. Патрулявалі, натуральна, і ўсё Балбасава. Але знайсці злачынцу не ўдавалася два дні. Плён даў зварот да людзей — 31-га ліпеня каля 21:00 мясцовы жыхар затэлефанаваў у міліцыю па нумары 102 і паведаміў, што бачыў чалавека, меркавана злачынцу, з ружжом. Той накіроўваўся на станцыю дызель-цягнікоў “Зорны”.
Міліцыянты ачапілі тэрыторыю станцыі і паспрабавалі адцясніць падазраванага на бяспечную адлегласць. Ускладнялася ўсё тым, што на станцыю якраз прыбываў дызель-цягнік, і неабдуманыя рашэнні п’янага чалавека з ружжом маглі прывесці да страшных наступстваў. Але, на шчасце, супрацоўнікі міліцыі і АМАПу ў дадзенай сітуацыі праявілі прафесіяналізм, здолелі адцягнуць увагу мужчыны спецыяльнымі сродкамі і затрымалі яго, піша сайт МУС. Спецсродкі спатрэбіліся, бо мужчына размахваў ружжом і адмаўляўся здавацца. Папярэдне ўсталявана, што мужчына сапраўды быў п’яны, а ружжо было баявым і зараджаным – у патронніку быў патрон. З затрыманым працуюць следчыя, у ліку іншага яны паспрабуюць даведацца ў мужчыны, дзе яму ўдавалася амаль двое сутак хавацца на маленькай тэрыторыі. Следства мяркуе, што ў сваю знаёмую мужчына страляў з мэтай наўмыснага забойства, а не простага прычынення шкоды здароўю.
