Позна ўвечары 31-га ліпеня быў затрыманы мужчына, які стрэліў з ружжа ў грудзі сваёй знаёмай. Верагодны матыў такога ўчынку - рэўнасць. Мужчына раніцай зайшоў у пад'езд да каханкі і стаў чакаць, калі тая выйдзе з кватэры, каб пайсці на працу. У 7:45 жанчына выйшла, і мужчына накіраваў на яе сваю зброю і стрэліў. Злачынца збег з месца падзей і амаль двое сутак хаваўся ад міліцыі. Урэшце, на чыгуначнай станцыі "Зорны" ён быў затрыманы з дапамогай спецсродкаў, бо быў п'яны і размахваў ружжом, адмаўляючыся здавацца.
44-гадоваму мужчыну, жыхару вёскі Барсукі, інкрымінуюць два артыкулы крымінальнага кодэксу Рэспублікі Беларусь. "Замах на злачынства" (артыкул 14, частка 1) і "Забойства" (артыкул 139 частка 1). Яму пагражае ад 6 да 15 гадоў зняволення.
Стралку яшчэ пашанцавала, што яго колішняя каханая выжыла і знаходзіцца ў бальніцы. Медыкі сёння паведамілі апошнюю інфармацыю: да выпіскі яшчэ далёка, але жыццю пацярпелай ужо нічога не пагражае.
