Больш за 30 гадоў, пражытых разам, трое вырашчаных дзяцей. Для жанчыны гэта азначала спакойную старасць, а для мужа тое, што можна пачаць піць. Алкаголь згуляў злы жарт з галавой сям'і, ён пачаў выпіваць і перастаў кантраляваць свае кулакі. Справа адбывалася ў Талачынскім раёне. Збіццё жонкі мужчына чыніў не аднойчы. Калі цярпець стала немагчыма, бедная пабітая жанчына набрала нумар міліцыі. І мужа забралі ў пастарунак міліцыі, у выніку судзілі, а адтуль бацька траіх дзяцей адправіўся ў ЛПП. Але, на жаль, рэчаіснасць у Беларусі такая, што метады лячэбна-працоўнага прафілакторыя не эфектыўныя. Што быў ён там, што яго не было. Як толькі муж вярнуўся з працяглай "камандыроўкі" ў ЛПП, ён зноў прыняўся ганяцца па кватэры за зялёнымі чорцікамі, клікаць невядомыя сілы на дапамогу і пераўтвараць спадарожніцу жыцця свайго на баксёрскую грушу. Надышоў час пакласці гэтаму канец.

Жонка выклікала міліцыю ізноў. У выніку справай занялася пракуратура і следчы камітэт. Нават тое, што пісьмовай заявы жонка на мужа так і не зрабіла, нягледзячы на гады здзекаў з сябе, не стала падставай заплюшчыць вочы на падзеі. За сістэматычнае нанясенне пабояў, фактычна катаванне, на мужчыну была заведзена крымінальная справа. Цяпер перад ім маячыць ужо не ЛПП, а нешта страшнейшае. У турме пітушчы муж можа правесці 3 гады.