Першая аварыя адбылася ў Віцебскім раёне на павароце на вёску Копці 3 жніўня. Двое мужчынаў, абодва жыхары Санкт-Пецярбурга, ехалі з Оршы ў кірунку Віцебска. Падобна на тое, што ўбодвух была бяссонная ноч, бо а 7 раніцы, калі ўсё адбылося, пасажыр у машыне спаў. Хіліла на сон і кіроўцу аўтамабіля. У выніку, 42-гадовы кіроўца не справіўся і заснуў за стырном. "Фольксваген Пасат", якім ён кіраваў, выляцеў на збочыну і перакуліўся.
У аварыі, праўда, сам кіроўца сур'ёзна не пацярпеў, а вось 26-гадовы пасажыр атрымаў пералом і шэраг ушыбаў. Ён быў дастаўлены ў абласную бальніцу, дзе і цяпер знаходзіцца на лячэнні.
Другая аварыя здарылася 6-га жніўня літаральна за 10 кіламетраў ад месца першай аварыі. Не зважаючы на выходны дзень, раніцай тут вяліся традыцыйныя летнія рамонтныя работы. 67-гадовы кіроўца аўтамабіля "Форд Фьюжн" потым тлумачыў, што толькі ў апошні момант заўважыў рамонтныя работы і не паспеў зрэагаваць. У выніку, ягоны аўтамабіль наехаў на шчэбнераскідальнік. Ад гэтага наезду сам кіроўца не пацярпеў, але засталося дасталося аднаму з рабочых, якія вялі рамонт. Работнік 1970 года нараджэння атрымаў пералом і быў вымушаны звярнуцца па медычную дапамогу.
Фота суполкі ДАІ Віцебск.
