Супрацоўнікі Аддзелу па барацьбе з эканамічнымі злачынствамі (АБЭЗ) устанавілі, што жыхарка Оршы, якая працавала галоўным бухгалтарам аднаго ўнітарнага прадпрыемства горада, незаконна завалодала грашовымі сродкамі, якія належалі арганізацыі. Выкарыстоўваючы свае службовыя паўнамоцтвы і злоўжываючы імі, жанчына скрала 35,7 тысяч беларускіх рублёў у свайго ж прадпрыемства. Скрала яна гэтую суму не адразу, а паступова. Проста залічвала гэтыя сродкі неабгрунтавана на сваю картку, у якасці заработнай платы.
Суд Оршы і Аршанскага раёну вынес свой прысуд па артыкуле "крадзеж шляхам злоўжывання службовымі паўнамоцтвамі". Жанчына асуджаная на 5 гадоў пазбаўлення волі з канфіскацыяй маёмасці. Акрамя таго, яна пазбаўлена права на 5 гадоў займаць пасады, звязаныя з выкананнем арганізацыйна-распарадчых і адміністратыўна-гаспадарчых функцый.
