У доме па адрасе Чырвонагвардзейская 5, што на Заходняй, капітальны рамонт распачаўся яшчэ восенню мінулага года. Жыхары дома парадваліся — будынку каля 40 гадоў і ўпершыню яго капітальна рамантуюць. У прынцыпе, гатовыя былі перацярпець і нязручнасці рамонту: бруд, часовае адключэнне вады і г.д.
Надыйшло лета — па ўсім горадзе прафілактычна адключаюць гарачую ваду, што таксама ўжо звыкла для беларусаў. Адключылася вада і ў доме па Чырвонагвардзейскай 5. Праўда, раней чым гэта трэба было па апублікаваных графіках. А потым аказалася, што ў суседніх дамах вада ёсць. У чым справа? Гарачая вада знікла ў сувязі з рамонтам, а не ў сувязі з летняй прафілактыкай. Ну, што ж, нязручна, але давядзецца цярпець — рамонт на тое і рамонт, каб быў з нязручнасцямі. Людзі не сталі скардзіцца. Прайшоў тыдзень без вады, другі тыдзень... І калі ўжо трэці тыдзень людзі сядзелі без гарачай вады гэта патрохі пачало раздражняць, нават, самых цярплівых. Пачалі цікавіцца — у падвале трубы знятыя, але аніякіх работаў па аднаўленні трубаў гарачай вады не робіцца.
У чым жа справа і колькі яшчэ чакаць аднаўлення камфортных умоваў? Як патлумачылі рабочыя, якія робяць капітальны рамонт — такая затрымка з-за памылкі праэкціроўшчыка. Па словах работнікаў, праэкціроўшчыкі пралічыліся і не запланавалі гэтыя работы. Адпаведна, яны не патрапілі ў смету і цяпер трэба чакаць пакуль праэкт будзе папраўлены. Колькі чакаць і колькі людзі будуць яшчэ без вады? Калі праэкціроўшчыкі справяцца хутка, то чакаць давядзецца яшчэ каля двух тыдняў. Атрымліваецца, што з-за чыёйсці памылкі жыхарам 30 кватэраў — а шмат з іх пенсіянераў для якіх праблематычна знайсці альтэрнатывы ўласнай ване — давядзецца больш за месяц быць без гарачай вады.
