Новыя выбары ў парламент пройдуць 17 лістапада 2019 года, дакладней, гэта будзе апошні дзень галасавання, бо амаль тыдзень да гэтай даты ў Беларусі ідзе папярэдняе галасаванне.
Агулам аршанцы змогуць прагаласаваць за двух кандыдатаў у дэпутаты і яшчэ траіх выбяруць у суседніх раёнах. Тое як на гэты раз "парэзаны" акругі ўжо вядома.
Нагадаем, што па кожнай выбарчай акрузе паводле мажарытарнай сістэмы, якая працуе ў Беларусі, будзе абраны адзін дэпутат. Цэнтральная акруга Оршы №25, якая называецца Аршанская гарадская акруга. На ўчастках гэтай акругі змогуць прагаласаваць жыхары большай часткі горада, за выключэннем чыгуначных раёнаў.
Тыя хто жывуць унутры чыгуначнага кальца, а таксама на Заходняй і па-за горадам галасаваць будуць на ўчастках Аршанскай-Дняпроўскай акругі №26. На абодвух акругах амаль роўная колькасць выбаршчыкаў - у гарадской 60.268, а ў Дняпроўскай - 58.861.
Суседнія раёны Віцебскай вобласці ўсе аб'ядналі ў яшчэ адну акругу - Сененскую. Такая назва, бо цэнтар яе будзе знаходзіцца ў Сянно, але геаграфічна гэтая акруга знаходзіцца па перыметры Аршанскага раёна і ўключае: Дубровенскі, Лёзненскі, Сененскі, Талачынскі раёны. На чатыры раёны будзе абраны адзін дэпутат.
У суседніх раёнах Магілёўскай вобласці таксама створана дзве акругі. Шклоўская акруга №90 ўключае ў сябе Бялынічскі, Круглянскі, Шклоўскі раёны, кавалак Магілёўскага раёна, канкрэтна Пашкоўскі сельсавет і частку Ленінскага раёна Магілёва са складанымі межамі.
Да Горацкай акругі №82 аднеслі тры раёны: Горацкі, Дрыбінскі і Мсціслаўскі.
У адрозненні ад усіх суседніх дзяржаў беларускія выбаршчыкі не галасуюць за партыі, а толькі за канкрэтных асобаў - гэта спецыфіка мажарытарнай сістэмы выбараў.
