Напярэдадні, 19-га чэрвеня, па Беларусі пракацілася хваля пратэстаў супраць дыктатарскага рэжыму. Людзі патрабавалі вызваліць усіх палітвязняў, у тым ліку кандыдата ў прэтэндэнты на прэзідэнцкіх выбарах Віктара Бабарыку, папулярнага блогера Сяргея Ціханоўскага, а таксама іх паплечнікаў, якія утрымліваюць у СІЗА-1 КДБ па вуліцы Валадарскага ў Менску. Людзі пляскалі ў далоні і выстройваліся ў ланцугі на асноўных гарадскіх вуліцах. Падобныя пратэсты прайшлі ў Менску, Гомелі, Баранавічах, Стоўбцах, Барысаве, Пружанах, Жлобіне, Віцебску, Берасці, Маладэчне, Ваўкавыску і іншых гарадах. У Оршы ўмовы для жывога ланцуга былі ці не найгоршыя. Апрача нашага горада дождж ішоў у гэты вечар хіба ў Гомелі. Людзям гэта не замінала, хто пад парасонам, а хто і без яго стаяў уздоўж Цэнтральнай плошчы на падтрымку акцыі. Яна трывала некалькі гадзін і завяршылася з заходам сонца. У некалькіх гарадах акцыя сконылася затрыманнямі (спіс), у Оршы быў затрыманы Раман Баброў. У Гомелі затрымалі глуханемага інваліда, а таксама, паводле інфармацыі тэлеграм-каналу "Баста", амапаўцы доўгі час не выклікалі хуткую затрыманаму з эпілепсіяй. У Маладэчне і Берасці людзі адбілі некалькіх таварышаў, не дазволіўшы сілавікам зацягнуць іх у мікрааўтобусы і аўтазакі. Таксама ёсць дзясяткі затрыманых мінакоў, якія не бралі ўдзелу ў акцыі, але апынуліся ў РАУСах.