Аршанка знаходзіцца ў турме па палітычным артыкуле за тое, што сарвала балаклаву з амапаўца. Праваабаронцы прызналі Наталлю Хершэ палітычнай зняволенай. Яна катэгарычна адмаўляецца падпісваць прашэнне аб памілаванні на імя Лукашэнкі, яе неаднаразова каралі карцэрам за адмову шыць форму для сілавікоў, а цяпер перавялі ў калонію ў Магілёве.

Муж Хершэ, які раней заяўляў пра падтрымку сваёй жонкі, цяпер паведаміў ёй у лісце, што разрывае адносіны, бо «ня можа вытрымаць разлукі».

«Канечне, мне патрэбен час, каб прывесці свае пачуцці ў стан спакою, але вялікай трагедыі стараюся з гэтага не рабіць. Яго можна зразумець, і асуджаць яго я не зьбіраюся. Іншым разам мы не можам паўплываць на абставіны жыцця, застаецца толькі прыняць іх з удзячнасцю. Так, гэта ўсё зьвязана з духоўнай працай над сабой. Дык, а для чаго тады турма, калі не менавіта для гэтага», — напісала Наталля ў лісце.

У Беларусі 702 чалавекі знаходзяцца ў турме па палітычных артыкулах, у тым ліку і аршанка са швейцарскім грамадзянствам Наталля Хершэ, якая жыла ў гэтай цэнтральнаеўрапейскай краіне ўжо шмат гадоў, яе першы муж, з якім яна таксама жыла ў Швейцарыі, памёр. За краты Хершэ, якая прыехала на радзіму і ўдзельнічала ў пратэстах, адправіў суддзя Сяргей Шаціла, ён прысудзіў ёй 2,5 гады турмы.