Праваабаронцы б’юць трывогу — стан здароўя вядомага аршанскага правабаронцы, кіраўніка мясцовай ячэйкі Беларускага Хельсіінскага камітэту, а зараз палітзняволенага Васіля Бераснева значна пагоршыўся. У яго пачаліся моцныя болі ў нырцы. Аб гэтым Orsha.eu паведамілі сваякі вязня.
Яшчэ ў 2018 годзе з-за анкалогіі Васілю Берасневу выдалілі адну з нырак. Сімптомы, якія зараз адчувае Васіль Ціханавіч, нагадваюць тыя, што былі некалькі гадоў таму. Вязень падазрае, што анкалогія зноў вярнулася. Аднак на патрабаванне абследавання адміністрацыя СІЗA № 1 на вуліцы Валадарскага ў Менску, дзе знаходзіцца праваабаронца, не рэагуе належным чынам. Максімум, чаго дамогся Бераснеў — рэгулярнай кропельніцы з моцным абязбольвальным.
Пры гэтым прыём абязбольвальнага прывёў да праблемаў з ціскам. Берасневу патрабуецца як мінімум абследванне, а, магчыма, нават шпіталізацыя.
Адмова ў належнай медычнай дапамозе ў месцах зняволення паводле міжнародных дакументаў прыраўніваецца да катаванняў. Правабаронцы паінфармавалі аб гэтым адпаведныя органы ААН.
Васіля Бераснева арыштавалі ў красавіку гэтага года па справе прафсаюзаў. Дату суду ў гэтай справе пакуль не паведамляюць.
Aгулам у Беларусі 1337 зняволеных па палітычных матывах, і гэта рэкорд за ўсе гады. Рэжым Лукашэнкі не шкадуе і саджае за краты па палітычных матывах у тым ліку падлеткаў, пенсіянераў, інвалідаў і цяжка хворых людзей.
Выпадак Бераснева будзе разглядаць спецыяльны дакладчык па пытанні аб праве кожнага чалавека на найвышэйшы дасягальны ўзровень фізічнага і псіхічнага здароўя, спецыяльны дакладчык па пытанні аб катаваннях і іншых жорсткіх, бесчалавечных або прыніжаючых годнасць відах абыходжання і пакарання, спецыяльны дакладчык па пытанні аб становішчы ў галіне правоў чалавека ў Беларусі.
