17 красавіка споўнілася 66 гадоў вядомаму беларускаму палітыку Рыгору Кастусёву. Аднак павіншаваць лідэра Партыі БНФ са святам сёння складана — Рыгор Андрэевіч знаходзіцца ў калоніі па палітычна матываваным абвінавачанні. Рэжым Лукашэнкі затрымаў яго 12 красавіка 2021 года ў Шклове, з якім шчыльна звязаная біяграфія Кастусёва. Яго змясцілі ў СІЗА па справе паводле артыкула 357 Крымінальнага кодэксу «Змова ці іншыя дзеянні, здзейсненыя з мэтай захопу дзяржаўнай улады».
Па гэтай справе, акрамя Кастусёва, праходзілі Аляксандр Фядута, Юрый Зянковіч, Дзяніс Краўчук і Вольга Галубовіч. Кастусёву прысудзілі 10 гадоў. Сваёй віны Кастусёў, нягледзячы на моцны ціск турэмнай адміністрацыі, так і не прызнаў. За кратамі ў спадара Рыгора абвастрыліся хранічныя захворванні, у яго выявілі анкалогію, але неабходнай дапамогі ён не атрымлівае.
Дзесяцігоддзя ўзмоцненага рэжыму ўладам падалося мала, і яны ўнеслі Кастусёва ў спіс асоб, датычных да «экстрэмісцкай дзейнасці».
Афіцыйная біяграфія палітыка гаворыць, што Рыгор Кастусёў нарадзіўся 17 красавіка 1957 года ў вёсцы Цяхцін Бялыніцкага раёна Магілёўскай вобласці. Беларус. Праваслаўны. Жанаты. Мае траіх дзяцей. Па адукацыі — інжынер-механік.
1975-1977 Служба ў Савецкай Арміі.
1983-1988 Галоўны інжынер саўгасу «Друць» Бялыніцкага раёна.
1988-1991 Дырэктар саўгасу «Іскра» Бялыніцкага раёна.
1995-2001 Дырэктар Шклоўскага раённага аб’яднаньня жыльлёва-камунальнай гаспадаркі.
2002-2004 Дырэктар сумеснага беларуска-ўкраінскага прадпрыемства «Гідрасіла — Белая Русь» у Магілёве.
Тройчы абіраўся дэпутатам мясцовых Саветаў. Пад час прэзідэнцкіх выбараў 2006 года быў даверанай асобай Аляксандра Мілінкевіча. У 2010 годзе сам быў кандыдатам у прэзідэнты, тады ж займаў пасаду намесьніка кіраўніка «Асьвейскай будаўнічай кампаніі». Затым узначаліў Партыю БНФ.
Кастусёў ніколі не пераходзіў з партыю ў партыю, заўсёды прытрымліваўся патрыятычнай пазіцыі, выступаў за вяртанне нацыянальных сімвалаў, бел-чырвона-белага сцяга і герба Пагоня. Выступаў за сацыяльныя праграмы, папярэджваў пра небяспеку Масквы і шмат гадоў адкрыта называў Лукашэнку дыктатарам.
Вы можаце павіншаваць Рыгора Кастусёва са святам, напісаўшы яму ў калонію. Адрас для лістоў: ПК № 22. 225295, Брэсцкая вобласць, г. Івацэвічы, ст. Даманава, а/с 20, Кастусёву Рыгору Андрэевічу.
