Кіеўскі апеляцыйны суд пацвердзіў вырак, вынесены завочна камандуючаму Чарнаморскім флотам Расеі Аляксандру Вітко аб пазбаўленні волі на 15 гадоў за ваенную акупацыю Крыму. Апеляцыю на вырак, вынесены ў траўні 2023 году, падаў адвакат Аляксандра Вітко. Тэрмін адбывання пакарання пачне адлічвацца з дня ягонага затрымання. Вітко, імаверна, знаходзіцца на тэрыторыі Украіны, але той яе частцы, якая знаходзіцца пад расейскай акупацыяй.
Камандуючага Чарнаморскім флотам Расеі, які нарадзіўся ў 1961 годзе ў Віцебску, абвінавачвалі паводле шасці артыкулаў Крымінальнага кодэксу Украіны. Канчатковае пакаранне прызначылі паводле сукупнасці злачынстваў шляхам паглынання менш строгага больш строгім пакараннем.
Згодна з выракам, Аляксандр Вітко цягам лютага-сакавіка 2014 году «спланаваў, падрыхтаваў і арганізаваў размеркаванне вайсковых падраздзелаў Расеі, якія ажыццявілі ўварванне на тэрыторыю Крыму, і забяспечыў маскаванне вайскоўцаў ЧФ Расеі для вядзення агрэсіўнай вайны супраць Украіны».
Дзяцінства і юнацтва Вітко, прызнанага Украінай ваенным злачынцам, прайшлі ў Воршы. Крымінальную справу супраць этнічнага беларуса, які даўно служыць імперскім інтарэсам Расеі, расследавалі з 2014 году.
