На таргі выставілі помнік архітэктуры XIX стагоддзя — тут размяшчаўся каталіцкі кляштар, зліквідаваны 200 гадоў таму расейскімі акупацыйнымі ўладамі. Продаж плануецца пад «аб’ект відовішчнага прызначэння», заўважыў тэлеграм-канал Katolik.life.
Будынак былога кляштара бернардынцаў у Дуброўне выстаўлены на продаж на Беларускай універсальнай таварнай біржы.
Будынак мае статус маёмасці, якая не выкарыстоўваецца, і знаходзіцца на балансе аддзелу культуры Дубровенскага райвыканкама. Помнік гісторыка-культурнай спадчыны прапануецца купіць для «размяшчэння аб’ектаў культурна-асветніцкага і (або) відовішчнага прызначэння».
А зямельны ўчастак — выкарыстоўваць для размяшчэння аб’ектаў жыллёвага будаўніцтва, адміністрацыйнага, гасцінічнага, фізкультурна-аздараўленчага прызначэння, рознічнага гандлю.
Драўляныя касцёл і кляштар у Дуброўне, пабудаваны ў 1630 годзе ў стылі барока. Імі апекаваўся віленскі кашталян Мікалай Глябовіч.
Касцёл — простакутны ў плане будынак, завершаны двухсхільным дахам. Галоўны фасад фланкіравалі дзве трох’ярусныя чацверыковыя вежы з купальнымі завяршэннямі і трохвугольным франтонам паміж імі. Да бакавога фасаду касцёлу прылягаў П-падобны ў плане двухпавярховы будынак кляштара (разам з касцёлам утвараў закрыты ўнутраны двор). Комплекс не збярогся з прычыны пажару ў 1801 годзе. Паводле легенды, тады адбыўся падпал, і зрабілі яго людзі ўладальніка Дуброўны Францішка Ксаверыя Любамірскага. Кажуць, за тое, што манахі абвянчалі ягоную дачку з бедным шляхцічам. Аднак легенда таксама цвердзіць, што неўзабаве Любамірскі раскаяўся і заняўся адбудовай.
У 1809 г. на іх месцы пабудаваны кляштар з касцёлам бернардзінцаў. Пасля паўстання 1830–1831 гадоў бернардынцы былі выгнаныя з Дуброўны расейскімі акупантамі, кляштар быў зачынены, а касцёл стаў парафіяльным.
У 1930 годзе ў рэчышчы антырэлігійнай палітыкі савецкай улады парафіяльны касцёл быў закрыты і аддадзены пад Рабфак, затым пад Дом культуры. Яшчэ ў ім была школа з расейскай мовай навучання. Праз некаторы час касцёл быў перабудаваны пад кінатэатр, а потым знішчаны.
Пазней у будынку кляштара месціліся адміністрацыйныя ўстановы. Будынак занесены ў Дзяржаўны спіс гісторыка-культурных каштоўнасцяў Рэспублікі Беларусь як аб’ект гісторыка-культурнай спадчыны рэгіянальнага значэння. У 1996 годзе будынак пачалі аднаўляць, але на праекце скончыліся грошы і справу закінулі.
Кляштар — двухпавярховае мураванае збудаванне з узаемна перпендыкулярнымі аб’ёмамі, накрыты двухсхільнымі дахамі, такое апісанне сустракаем у кнізе «Архітэктура Беларусі: Энцыклапедычны даведнік», выдадзенай у Менску ў 1993 годзе ў БелЭН. Тарцы дахаў завяршаюцца трохвугольнымі франтонамі з круглымі вокнамі ў цэнтры. Планіроўка галерэйна-калідорная, у месцы злучэння аб’ёмаў вітыя ўсходы. Фасады расчлянёныя тонкімі пілястрамі, карнізамі, паяскамі. У архітэктуры кляштара выявіліся асобныя рысы стылю барока.
Каталіцкая парафія Дуброўны мае патранат Маці Божай Фацімскай.
Пачатковы кошт лоту — 371 тысяча рублёў (больш за 110 тысяч даляраў). Электронныя таргі адбудуцца 2 снежня.
