Пасля некалькіх пераносаў нарэшце адбыўся суд над Віталём Паўлавым — вядомым аршанскім грамадскім актывістам, які зафіксаваў шэраг парушэнняў з боку выбарчай камісіі на ўчастку ў сярэдняй школе № 5. Падчас працы назіральнікам Віталь Паўлаў зафіксаваў, што выбары на ягоным участку праходзілі непразрыста, не ў згодзе з прынцыпамі адкрытасці і дэмакратыі. На наступны дзень пасля выбараў Віталь Паўлаў быў брутальна затрыманы міліцыяй, яго звінавацілі ў выкарыстанні нецэнзурных выразаў на ўчастку для выбараў. Пры гэтым адметна, што ў сам дзень выбараў ніхто з чальцоў выбарчай камісіі не скардзіўся на брудныя словы, абразы з боку незалежнага назіральніка, ніякіх мераў не прыняў і супрацоўнік міліцыі, які знаходзіўся пры выкананні сваіх службовых абавязкаў.
Усё гэта намякала на яўную "фабрыкацыю" справы і яе палітычную падаплёку. Аднак абвінавачанне было высунута і пачаўся суд. Некалькі разоў на розных падставах судовае пасяджэнне пераносілася, і нарэшце, у чацвер 10-га лістапада прагучаў вырак па справе. Пры гэтым на рашаючае пасяджэнне не з'явіўся супрацоўнік міліцыі, якога "неспадзявана" накіравалі ў камандыроўку ў Копысь. Сябры выбарчае камісіі, якія падчас выбараў не скардзіліся ні на якія маты, раптам змянілі свае думкі і "ўзгадалі", як назіральнік ужываў словы з нецэнзурнага лексікона. Суд паверыў боку абвінавачання і прысудзіў Віталя Паўлава да штрафа ў 2 базавыя велічыні, што на дадзены момант складае 42 рублі.
Сам назіральнік лічыць, што справа супраць яго сфабрыкавана не проста так, а дзеля таго, каб сфармаваць у народзе думку пра некультурнасць людзей, якія крытыкуюць працэдуру выбараў у Беларусі. Суды над грамадскімі актывістамі, назіральнікамі і прадстаўнікамі палітычных партый даўно ўвайшлі ў моду цяперашняй улады. Зазвычай актыўныя людзі атрымоўваюць абвінавачанні ў якім-небудзь дробным хуліганстве, бруднай лаянцы, і атрымліваюць за гэта суткі зняволення альбо грашовыя штрафы, што паказвае на тэндэнцыёзнасць падыходу да дэмакратычных актывістаў і прадвызначанасць судовых разбіральніцтваў яшчэ да іх пачатку.
У распараджэнні нашага сайту з'явіліся два фотаздымкі, выбачаемся за іх не самую высокую якасць. Здымкі з залі суда зробленыя адным з наведвальнікаў судовага працэсу.
