Паўгода Сяржук Доўгушаў правёў у Злучаных Штатах Амерыкі, дзе выступаў, ладзіў музычныя імпрэзы і займаўся іншай дзейнасцю па сваім профілі. Цяпер выхадзец з вёскі Тарчылава на Аршаншчыне вярнуўся на Радзіму і разгарнуў дзейнасць па новых праектах. У прыватнасці, у прыярытэтах Сержука цяпер годна ўшанаваць 200-годдзе славутага беларускага кампазітара Станіслава Манюшкі. На 18-га траўня ў Менску запланаваны "Спеўны сход", прысвечаны Манюшку (на афішы). Акрамя таго, пачаўся збор грошай на фанаграмы для спеваў, песенная спадына Станіслава Манюшкі багатая.
Напярэдадні Доўгушаў даў інтэрв'ю "Радыё Свабода", у якім распавёў пра свае экспедыцыі на Палессе, планы па новых "Спеўных сходах", свае погляды на спробы "ўкраінізацыі" беларускага Заходняга Палесся (Сяржук сказаў, што нават самі жыхары гэтага беларускага рэгіёна не лічаць сваю мову больш блізкай да ўкраінскай і з'яўляюцца проста палешукамі-беларусамі, як, напрыклад, кашубы ў Польшчы адначасова і кашубы, і палякі).
