Мацнейшы галалёд, які ўзнік у Оршы яшчэ ў пятніцу, відавочна, зацягнецца. Медыкі паведамляюць, што толькі за адзін дзень такога надвор’я ў Беларусі траўмы атрымала больш за тысячу чалавек. І гэта толькі тыя хто звяртаўся па медычную дапамогу. А варта даплюсаваць да гэтага яшчэ і велізарную колькасць аварыяў, праўда, пераважна лёгкіх, каб зразумець наколькі небяспечныя зараз і дарогі і тратуары.

Але відавочна, што галалёд працягнецца. На тыдні — абяццаюць сіноптыкі — нас чакаюць і далей перапады тэмператураў. Заўтра — у нядзелю 13 снежня — на ноч будзе пахаладанне да −7 градусаў, але днём пацяплее да 0 градусаў і пойдзе снег. З аднаго боку, снег зменьшыць галалёд. але пры 0 градусаў на сонцы ён можа таяць і зноў жа ствараць лёдавую корку на дарогах. У панядзелак над горадам будзе ісці мокры снег пры тэмпературы 0 −2 і зноў такое надво’е будзе ствараць галалёд. І так, як мінімум да пятніцы. З дажджамі, мокрым снегам і перападамі тэмператураў.

Лёд стварае небяспеку не толькі ў горадзе, але і на вадаёмах. Аматары зімой рыбалкі ўжо паехалі на вазёры ў спадзяванні на дастатковую таўшчыню ільда. І найбольш неабачлівыя ўжо патрапілі ў непрыемнасці. Па Віцебскай вобласці зафіксаваныя выпадкі калі рыбакі правальваліся пад лёд.

МНС паведамляе, што пакуль яшчэ лёд мае малую таўшчыню і выходзіць на яго небяспечна. Больш за тое, афіцыйна ўведзена забарона выходзіць на лёд.