Калі за 10 дзён 2021 года ў Аршанскі РАУС аб фактах крадзяжу грашовых сродкаў з банкаўскіх карт паведамілі пяць жыхароў рэгіёну, то толькі за адны содні 11 студзеня іх было ўжо шэсць.
- За першыя дні новага года з банкаўскіх карт аршанцаў выкралі больш за 6 тысяч рублёў, - распавяла афіцыйны прадстаўнік Аршанскага УУС Вольга Ракава. - У адной пацярпелай знялі амаль 4 тысячы рублёў не толькі з заработнай платы карткі, але і крэдытнай. Ёй патэлефанаваў невядомы на Вайбер, назваўся супрацоўнікам банку, папрасіў назваць дадзеныя карткі, нібыта каб пазбегнуць крадзяжу грашовых сродкаў. Не раздумваючы, жанчына назвала ўсе неабходныя лічбы, а калі праз некаторы час прыйшла ў банк, каб асабіста спытаць, заблакавалі ці яе картку "ад ашуканскіх замахаў", тады даведалася, што з банкаўскіх картак спісалі ўсе грошы.
Вольга Ракава адзначае, што ашуканцы часцей за ўсё тэлефануюць у вячэрні час, у асноўным перад выходнымі днямі. Узрост пацярпелых ад 40 да 65 гадоў:
- У чарговы раз звяртаемся да жыхароў рэгіёну: будзьце пільнымі і асцярожнымі! Не паведамляйце пабочным асобам дадзеныя банкаўскай карты, лагін і пароль, смс-паролі для пацверджання аперацый. Не публікуйце ў сацсетках дадзеныя вашай карткі. Не пераходзьце па спасылках у паведамленнях ад неправераных адпраўнікоў. Папярэдзьце пажылых знаёмых і сваякоў аб магчымых званках махляроў. Будзьце вельмі ўважлівымі, калі прадаеце або купляеце праз Інтэрнэт якія-небудзь рэчы. Усю інфармацыю правярайце асабіста пры наведванні аддзялення банку.
