Як паведамляюць чытачы нашага сайту, расейскія калоны тэхнікі перамяшчаюцца не толькі па Гомелі ці Мазыры, недзе на поўдні нашай краіны, ездзяць яны і па Воршы. Здымкі, якія даслалі нам у рэдакцыю, зробленыя апошнімі днямі. Расейская тэхніка са злавеснай літарай «Z», якая абазначае крывавую аперацыю Пуціна і Расеі на тэрыторыі Украіны. Расейскія салдаты, якіх міжсобку аршанцы пачынаюць называць акупантамі, набываюць прадукты ў крамах, пераважна алкаголь. Мясцовая міліцыя толькі назірае за гэтым, гэта тычыцца ўсіх беларускіх гарадоў. Тэрыторыя нашай дзяржавы фактычна аддадзена пад кантроль расейскім войскам, якія з яе наступаюць на Кіеў і Чарнігаў.

Паводле інфармацыі ўкраінскага Генштабу, ужо звыш 14 тысяч расейцаў загінула ў гэтай захопніцкай вайне, якую Пуцін развязаў 24 лютага. Беларускія дзяржаўныя прапагандысцкія каналы рэтранслююць расейскі погляд на падзеі, замоўчваючы праўду. А яна жахлівая. Больш за 3 мільёны ўкраінцаў сталі бежанцамі, забіты тысячы мірных грамадзян, якіх прапаганда называе «ліквідаванымі нацыстамі». Напрыклад, 16 сакавіка пад абстрэл у Запарожскай вобласці трапіла калона людзей, ёсць загінулыя і параненыя, у тым ліку сярод дзяцей. А таксама ў сераду расейская авіяцыя скінула бомбу на Марыюпальскі тэатр, у скляпеннях якога ад бамбаванняў хаваліся жанчыны і дзеці.