Фігурантамі справы, а цяпер і падазраванымі ў махінацыі сталі двое маладых хлопцаў: 20-гадовы жыхар Віцебску і 21-гадовы наш зямляк з Оршы. Хаця абодва хлопцы вельмі маладыя, за спіной ужо мелі судзімасці. І на іх развод павёўся 61-гадовы мужчына з Магілёва.
Для таго, каб пажывіцца і пагуляць за чужы кошт маладзёнам не трэба было выдумляць хітрыя схемы, 61-гадовы іхны прыяцель аказаўся дастаткова наіўным, каб паверыць у сумленнасць раней судзімых сябручкоў.
Яны проста папрасілі яго аформіць на сябе круты, дарагі мабільнік у 3.000 рублёў. Растэрміноўку яны паабяццалі яму выплочваць штомесячна, але ж не збіраліся гэтага рабіць у прынцыпе. Здаецца ў той жа дзень, атрымаўшы тэлефон, яны яго прадалі і прагулялі грошы. Наколькі просты быў падман, настолькі ж і простае было следства. Падзельнікаў знайшлі хутка і цяпер на іх заведзена крымінальная справа - паведамляе дзяржаўная інфармацыйная агенцыя БелТА.
