Напачатку года многія спецыялісты аналізуюць год папярэдні. Прапануем і нашым чытачам праз удзел у новым апытанні на сайце вызначыць падзею ў нашым рэгіёне, якая найбольш паўплывала на Аршаншчыну. Рэдакцыя сайту выбрала з кожнага месяца мінулага году падзеі, якія былі найбольш рэйтынгавыя ці мелі нейкія значныя наступствы. Гэтыя падзеі і ўвайшлі ў топ-12 складзеных нашай рэдакцыяй, які і прапануем ацаніць чытачам. Калі ж на ваш погляд былі іншыя значныя падзеі, якія не ўвайшлі ў наш топ, прапануем называць іх у каментарах да гэтага артыкула.

Студзень - у Оршы прайшоў міжнародны шахматны турнір, які сабраў 330 гульцоў. Пры ўсёй колькасці спартовых падзеяў году, гэтая стала найбольш масавай па прыцягненні спартоўцаў. Асабліва прыемна, што ў гэтым годзе аршанцы занялі першае месца ў камандным заліку.

Люты - самай значнай падзеяй, якая, праўда, мала ўплывае на рэгіён, але стала вельмі рэйтынгавай - забойства аршанскага таксіста грамадзянінам Расіі. Да канца году забойца быў знойдзены і зараз рыхтуецца да суда.

Сакавік - у лютым у нашым рэгіёне, як і па ўсёй краіне ішла выбарчая кампанія. Па выніках яе сфармаваны новы раённы Савет дэпутатаў, раней абіралася два Саветы - раённы і гарадскі.

Красавік - на намесніка старшыні райвыканкаму заведзена крымінальная справа. За год да справы былі далучаны яшчэ дзве крыміналкі, а пасада намесніка і зараз застаецца вакантнай.

Май - да святкавання 9 мая ў аршанскі парк Герояў была пастаўлена вайсковая тэхніка, што стварыла яшчэ адзін цікавы аб'ект у горадзе, але выклікала вялікую палеміку на старонках сайту наконт густоўнасці праэкту.

Чэрвень - Традыцыйная для ўсяго свету "Ноч музеяў" прайшла ў нашым горадзе ў новым фармаце. Раней агульнае мерапрыемства ўсімі музеямі рабілася ў Езуіцкім калегіюме на агульнай пляцоўцы. Цяпер амаль кожны музей рыхаваў мерапрыемства індывідуальна.

Ліпень - вядомы ў горадзе Аляксей Талай стаў грамадскім дзеячом і абвесціў пра стварэнне ініцыятывы "Чыстыя помыслы".

Жнівень - гэты месяц быў вельмі сціплы па значных падзеях. Адной з заўважных падзеяў стала правядзенне першага ў горадзе аматарскага турніру па нардах, які арганізавала АМГА "Звяз", хаця значнасць падзеі для горада спрэчная.

Верасень - гэты месяц стаў пікам адзначэння 500-гадовага юбілею Бітвы пад Оршай. У гэтым годзе дзякуючы юбілею Орша гучала ва ўсіх СМІ усходняй Еўропы, святкаванні праводзіліся ў Літве, Украіне, Польшы, Беларусі ды іншых краінах.

Кастрычнік - доўгачаканая кандытарская фабрыка "Сладкая страна", нарэшце, пачала працаваць. Праўда, пакуль тавараў яе вытворчасці на паліцах аршанскіх крамаў не шмат.

Лістапад - футбольны клуб Орша ўпершыню за 10 год выйшаў у першую лігу чэмпіяната краіны.