Карэспандэнт orsha.eu прайшоў па кропках нашага горада, дзе гандлююць літаратурай і мапамі. У Магілёве пэўны час прадавалі мапы і глобусы, на якіх паўвостраў Крым быў пазначаны тэрыторыяй Расеі, хаця Рэспубліка Беларусь на дзяржаўным узроўні прызнае Крым тэрыторыяй Украіны. Адметна, што не ўсе такія глобусы вырабляліся ў самой Расеі. Глобусы з "расейскім Крымам" былі вырабленыя і польскай фірмай "ZACHEM-GŁOWALA". У фірме тлумачылі, што вырабілі глобусы, дзе Крым — тэрыторыя Расеі на запытанне расейскіх партнёраў, каб не губляць рынак у гэтай краіне і зарабляць грошы.
У аршанскіх кнігарнях правакацыйных глобусаў і мапаў няма. Большасць атласаў вырабленыя рэспубліканскім унітарным прадпрыемствам "Белкартаграфіяй", там Крым пазначаны часткай Украіны. А мапы расейскай вытворчасці, якія прадаюцца ў Оршы, надрукаваныя да 2014 года, калі пачалася акупацыя Крыма войскамі. Адпаведна, і там паўвостраў Крым выступае як суб'ект дзяржавы Украіна.
