Многія аршанскія настаўнікі сёлета, як і летась, не атрымаць цэльнага адпачынку. Справа ў тым, што стандартны адпачынак у многіх з іх разрываецца на дзве часткі. Настаўнікі пасля заканчэння прыкладна паловы адпачынку мусяць вярнуцца ў школу на некалькі дзён на акрэдытацыю школы і іншыя рэчы, а затым зноў ідуць, "дагульваць" адпачынак. Робіцца гэта з-за недахопу сродкаў у Аддзела адукацыі, які не заўсёды здольны выплаціць усе "адпускныя" адразу.
Некаторыя настаўнікі вырашаюць праблему па-асобаму - затыкаюць працоўныя дні, якія пастаўлены ім пасярэдзіне адпачынку, адгуламі. Дакладней, яны вымушаныя марнаваць свае адгулы на гэта замест таго, каб скарыстацца заробленымі адгуламі ў сапраўды патрэбныя дні. Такім чынам, у далёкую паездку на ўвесь адпачынак, напрыклад, могуць з'ехаць не ўсе настаўнікі.
Пра сітуацыю многія настаўнікі маўчаць, ды паслухмяна выконваюць падобныя прадпісанні высокага начальства. Аднак незадаволенасць сітуацыяй усё расце. У Оршы ёсць настаўнікі, якія ідуць у падобны "рваны" адпачынак ужо не першы год.
