Гэта гісторыя пачалася з таго, што некалькі жыхароў дамоў па вуліцах Сямёнава і 60 год БССР у Оршы звярнуліся ў Аршанскі райвыканкам з просьбай стварыць пляцоўку для дзіцячых гульняў, дзе дзятва з бліжэйшых дамоў змагла б бяспечна і недалёка ад месца жыхарства праводзіць свой час. Нягледзячы на тое, што мікрараён пабудаваны больш за 30 гадоў таму, каля некаторых дамоў зусім няма дзіцячых гульнявых пляцовак, дзе дзеці маглі б бяспечна гуляць і праводзіць вольны час. З-за гэтага частка дзяцей сыходзіць гуляць далёка ад дома, што вядома ж турбуе бацькоў.
У канцы траўня на месцы адбылася сустрэча з прадстаўнікамі аддзела архітэктуры і ЖЭУ-4, якія на ўсе пытанні і просьбы адказвалі адной адзінай фразай "Грошай няма, зусім няма, будуйце самі за свае сродкі". Прыкладна такі ж адказ утрымліваўся і ў афіцыйным адказе, падпісаным намеснікам старшыні райвыканкама А.І.Пальвінскім.
Такая пазіцыя чыноўнікаў выклікала ў жыхароў пытанні. Зразумела, часы цяпер не самыя лёгкія, але ж райсавет прыняў бюджэт Аршанскага раёна, сродкі на добраўпарадкаванне вылучаныя. Чаму ж па словах чыноўнікаў "грошай няма зусім"? Па-другое, у адпаведнасці з Пастановай міністэрства ЖКГ №16 ад 20.04.2005 са зменамі і дапаўненнямі, добраўпарадкаванне дзіцячых пляцовак як раз і адносіцца да выдаткаў, выконваемых за бюджэтныя сродкі.
Адзін з жыхароў пракаментаваў гэтую сітуацыю так: калі камунальнікі кажуць, што яны наогул нічога не могуць зрабіць, дык няхай складаюць з сябе паўнамоцтвы. Навошта яны патрэбныя ў такім выпадку. А за заашчаджаную іх зарплату як раз і можна пабудаваць дзіцячую пляцоўку. І нават не адну.
