Віцебскія следчыя завяршылі папярэдняе расследванне крымінальнай справы ў адносінах да дзвюх групаў людзей. Трое жыхароў Оршы, адзін Менска і трое грамадзянаў Расеі распрацавалі шкодныя кампутарныя праграмы, якія дасылалі на кампутары і мабільныя прылады грамадзянаў. Пасля гэтага браўзэры блакаваліся, а грамадзянам прысылалася апавяшчэнне з міліцыі пра штраф за прагляд парнаграфічных матэрыялаў.
Насамрэч у Крымінальным і Адміністратыўным кодэксах караюцца рознымі мерамі прадукаванне, распаўсюд парнаграфіі, але ж ніяк не яе прагляд. Многія грамадзяне, відаць, не былі знаёмыя з кодэксамі, і таму ўзялі на веру паведамленне, прысланае ім. У "лісце шчасця", прысланым людзям, гаварылася, што за прагляд порнаматэрыялаў ім неабходна выплаціць на адмысловы рахунак і нумары мабільных тэлефонаў 500-550 тысяч недамінаваных рублёў (50-55 рублёў пасля дэнамінацыі).
Адна група такім чынам забрала 640 мільёнаў недамінаваных рублёў, а другая амаль 30 мільёнаў. Следствам былі сабраныя 39 тамоў справы і ўстаноўлены 120 пацярпелых, але, як падазраюць у міліцыі, махляры пад выглядам міліцыянтаў такім спосабам праз інтэрнэт выцягнулі грошы ў больш як тысячы іншых людзей, якія проста не заявілі ў органы, не звярнуліся да сапраўдных супрацоўнікаў міліцыі. Лідэрам злачыннай групы быў былы студэнт ІТ-спецыяльнасці, які закінуў сваю вну. Пакліканне ён знайшоў у крымінале. Менавіта арганізатар і водца дадзенай злачыннай схемы і быў арыштаваны першым.
Пракуратура Віцебскай вобласці накіравала дадзеную крымінальную справу ў суд Аршанскага раёна і горада Оршы. Там і будуць судзіць трох аршанцаў і аднаго менчука. Наконт расейцаў пакуль няма вызначанасці, але іх крымінальная справа вылучана ў асобную вытворчасць, хутчэй за ўсё іншаземныя грамадзяне будуць высланыя на сваю радзіму і суд над імі адбудзецца ўжо ў Расеі.
Дзеянні зламыснікаў кваліфікаваныя па артыкуле "Выкраданне маёмасці шляхам выкарыстання кампутаровай тэхнікі, здзейсненае ў асоба буйным памеры". Санкцыя дадзенага крымінальнага артыкула прадугледжвае пакаранне ў выглядзе пазбаўлення волі на тэрмін ад 6 да 15 гадоў з канфіскацыяй маёмасці і пазбаўленнем права займаць пэўныя пасады альбо займацца пэўнай дзейнасцю альбо без пазбаўлення.
