У Оршы адбыўся судовы працэс над махляром, які пад рознымі падставамі браў "панасіць" у дзяўчын залатыя ўпрыгожанні, а потым не вяртаў іх. Праз сайт знаёмстваў ён выходзіў на дзяўчын ад 15 да 27 гадоў, пачынаў сустракацца з імі. Дзякуючы свайму характару, сваім паводзінам ён уваходзіў у давер да дзяўчын, з бацькамі, натуральна, знаёміцца не збіраўся - надта кароткімі звычайна былі стасункі. А вось да дзяўчыны, калі яна адна дома, прыходзіў. На "мясцовасці" ён даволі хутка арыентаваўся, дзе якія каштоўнасці. Прасіў "панасіць" залатыя ўпрыгожанні, напрыклад, пажартаваць з сяброў, паказаўшы ім пярсцёнак на пальцы, нібыта ён ажаніўся, а тыя прапусцілі дадзены факт біяграфіі. У выніку злачынца сабраў "ураджай" з дзясятка ювелірных упрыгожанняў - завушніцы, залатыя ланцужкі і бранзалеты, пярсцёнкі. Наіўнасць дзяўчын і няздольнасць адрозніць сапраўдныя высокія пачуцці ад халоднага бандыцкага разліку спрыяла махляру. Адна з пацярпелых перадала яму ўсе ўпрыгожанні, а таксама ноўтбук і відэакамеру.

Адметна, што ў міліцыю з заявай звярнулася толькі адна дзяўчына. Яна цярпела, аднак махляр неяк збіў яе, калі прыйшоў да яе п'яны. "Казанову" судзілі па трох артыкулах Крымінальнага кодэксу: махлярства, крадзеж з пранікненнем у жытло, нанясенне лёгкіх цялесных пашкоджанняў. Як часта бывае ў такіх судовых працэсах, пацярпелыя ад махляра дзяўчыны плакалі, выціралі слёзы і прабачалі свайго 25-гадовага ашуканца. Але ад чарговага, ужо 4-га візіту ў турму за падобныя дзеянні гэта яго не ўратавала. Ён асуджаны да 3,5 гадоў калоніі строгага рэжыму. З прысудам ён не пагадзіўся і будзе абскарджваць яго.