Матэрыял той быў апублікаваны на нашым сайце яшчэ 29 студзеня. Прачытаць яго можна тут.

Як нам удалося даведацца, ПВУП "ТопЕвроСтрой" сапраўды існуе і заснавальнікам яго з'яўляецца сын намесніка старшыні райвыканкама Івана Хурбатава Андрэй Хурбатаў. Праверка гэтага прадпрыемства сапраўды вядзецца, ажыццяўляюць яе КДБ і РАУС. Прычыну, па якой такая праверка была прызначана, нам даведацца не ўдалося. У рамках гэтай праверкі для допыту выклікаліся кіраўнікі многіх аршанскіх прадпрыемстваў, у першую чаргу са структурных падраздзяленняў будтрэста і электрычных сетак. Вынікаў праверкі пакуль няма, але па наяўнай неафіцыйнай інфармацыі нейкія парушэнні выяўлены былі.

Што характэрна, калі міліцыя задавала кіраўнікам пытанні выключна ў эканамічнай галіне, то рыцары плашча і кінжала пастаянна спрабавалі знайсці яшчэ і нейкі палітычны падтэкст. Аказалася, што ціск на аднаго з актывістаў БСДП Барыса Крупнова звязана менавіта з гэтай справай, бо Крупноў з'яўляўся галоўным інжынерам той самай фірмы. Мабыць, камусьці з мясцовых чэкістаў хочацца атрымаць прэмію за раскрыццё у Оршы нейкай змовы, замяшанай на палітыцы і карупцыі адначасова.

Менавіта па прычыне такога ціску Барыс Крупноў сабраўся пакінуць краіну, а магчыма яе ўжо пакінуў.

Пры з'яўленні новай інфармацыі будзем інфармаваць нашых чытачоў.