Звычайна зводка УУС паведамляе пра вельмі дробныя крадзяжы на Аршаншчыне, але гэты тыдзень стаў выключэннем - у зводках даволі "дарагія" крадзяжы. Так, 18 сакавіка днём пасля супольнага распіцця алкаголю са знаёмым 59-гадовы мужчына заўважыў, што ў яго з дома знік ноўтбук.
У ноч з 20-га на 21-е сакавіка невядомы скраў мапед "Хорс", які застаўся начаваць на вуліцы каля дома гаспадара. Мапед быў ацэнены ў 1.500 рублёў.
У перыяд з 13 на 16-е сакавіка на будаўніцтве прыватнага дома невядомы сарваў замок з недабудаванага будынка і скраў электрарухавік ды розныя электраінструманты агулам на суму ў 200 рублёў.
А ў 89-гадовага пенсіянера, які пражывае на завулку Палявым у перыяд з 11 па 16 сакавіка пры невядомых абставінах было скрадзена 300 рублёў проста з дому.
