Як стала вядома, 28-га траўня ў раёне цагельнага завода ў Оршы здарылася сур'ёзная аварыя. Аўтамабіль "Лада", на слэнгу аўтамабілістаў проста "дзявятка", рухаўся з другаснай дарогі з боку Міцькаўшчыны, выляцеў на перакрыжаванне з галоўнай дарогай і сутыкнуўся з мікрааўтобусам "Форд". Мікрааўтобус ад удару перакуліўся, а "дзявятка" пераляцела чатыры паласы руху, пратараніла металічны плот і захрасла ў ім. Як распавялі сайту abw.by сведкі здарэння, у "дзявятцы" з расейскімі нумарамі, якая ўчыніла такое сур'ёзнае дарожна-транспартнае здарэнне, было чатыры чалавекі. Усе яны, улічваючы нават кіроўцу аўтамабіля, былі п'яныя.
Яны ў аварыі моцна не пацярпелі, а пасля прыбыцця супрацоўнікаў ДАІ нецвярозы кіроўца пачаў агрэсіўна даказваць, што ў машыны проста адмовілі тармазы. Але агрэсіўны тон, па сведчаннях тых, хто бачыў здарэнне, стаў прычынай затрымання кіроўцы проста на месцы ДТЗ.
