Аб доме № 16 па вуліцы Заслонава і яго жахлівым стане наш сайт раней ужо пісаў. Зараз жыхары дома на 18 аднапакаёвых кватэр звярнуліся па дапамогу да рэспубліканскага выдання «СБ» і здолелі дамагчыся свайго. Папярэднія абяцанні чыноўнікаў так і заставаліся абяцаннямі. Аварыйны дом горшаў кожны квартал. Паглядзім, што напісала «СБ».
Упершыню мы пабывалі на вуліцы Заслонава, 16 восенню мінулага года. Пагутарылі тады і з начальнікам аддзела жыллёва-камунальнай гаспадаркі райвыканкама, на той момант Сяргеем Жэлдзібаевым. Паводле яго сцверджання, спецыяльная камісія вызначыла санітарны і тэхнічны стан дома непрыдатным да пражывання. І гэтая акалічнасць прадугледжвае знос дома з выдзяленнем жыхарам арэндных кватэр і выплату кампенсацыі за жылплошчу, якой яны пазбавіліся. Пры гэтым кіраўнік пазначыў, што атрыманых грошай не хопіць, каб набыць у Оршы аднапакаёвую кватэру. Калі раней людзі ў такой сітуацыі маглі прэтэндаваць на ўласнае раўнацэннае жыллё ў новых сценах, то цяпер заканадаўства змянілася. Валакіту з рашэннем пытання патлумачыў тым, што на бягучых рамонтах спадзяваліся праблемны дом падтрымліваць у здавальняючым стане, але надзеі не спраўдзіліся.
Варыянт з арэндным жыллём уласнікаў кватэр у аварыйным доме не задавальняе. Пенсіянерка Лідзія Шчаўрук тлумачыць чаму:
— У доме пражываюць ветэраны працы і сем’і з невысокімі даходамі. За што нам плаціць арэнду? Калі з-за непаваротлівасці камунальнай службы і райвыканкама мы апынуліся ў такім становішчы і нам па закону нельга выдзеліць уласнае жыллё, то хай адрамантуюць дом у адпаведнасці з санітарнымі і тэхнічнымі патрабаваннямі.
У красавіку ў людзей з’явілася надзея. З добрымі навінамі да іх прыехалі намеснік старшыні райвыканкама Канстанцін Селіванаў і генеральны дырэктар прадпрыемства «Оршакамгас» Сяргей Шыдлоўскі. Запэўнілі — дом будуць рамантаваць. Аб канкрэтных планах і тэрмінах жыхароў абяцалі інфармаваць. Яны натхніліся: нарэшце дагрукаліся. Але на гэтым дыялог абарваўся. Не дачакаўшыся адказу, яны зноў напісалі ліст у рэдакцыю.
На гэты раз па знаёмым адрасе карэспандэнты прыехалі ў кампаніі прадстаўнікоў КУП «Оршакамгас». З восені ў доме нічога не змянілася, акрамя таго, што жыхароў пад страхам зносу прымусілі пафарбаваць прыдамавыя адрыны, а камунальнікі памазалі фарбай лаўкі і зачынілі яму ў бамбасховішча. Раней і гэтага не было...
Таксама газета звярнулася да Таццяны Галеевай, начальніку аддзела жыллёва-камунальнай гаспадаркі Аршанскага райвыканкама:
— Райвыканкам прыняў катэгарычную пазіцыю жыхароў дома. У цяперашні час вызначана арганізацыя (ТДА «Юнилайн Проект»), якая будзе распрацоўваць праектна-каштарысную дакументацыю для правядзення капітальнага рамонту дома. Праект павінны падрыхтаваць да снежня. Аб тэрмінах пачатку капрамонту жыхары будуць праінфармаваныя дадаткова.
