На працягу апошніх гадоў трыццаці Гомель прынята звязваць ці з экстрэмальнай музыкай, ці з блюзам. Але не толькі гэтымі жанрамі квітнее гомельская музычная сцэна. Антымузыкі, шумавікі, эксперыментатары, перформеры з гурта Simulacross таму пераканаўчы доказ, піша Budzma.
На днях гурт выклаў свой magnum opus — альбом «Дзікае паляванне караля Стаха», натхнёны аднайменным творам Уладзіміра Караткевіча. Цяжка вызначыцца з жанрам, у якім створана праца, — тут можна пачуць элементы дарк эмбіенту і краўт-року, нойза і псіхадэліі. Самі музыкі вызначаюць яго як «хтанічны краўт»
Запіс альбому расцягнуўся амаль на паўтара года — ад стварэння канцэпцыі да рэлізу. Па словах удзельнікаў Simulacross, яны хацелі выдаць альбом да 90-годдзя Уладзіміра Сямёнавіча, але другая хваля каранавірусу перашкодзіла гэтым планам.
Гэта ўжо другі раз, калі «Сімулякры» звяртаюцца да беларуская літаратуры. Не так даўно яны выдалі альбом «Шляхціц Завальня» па творы Яна Баршчэўскага.
