Aдзін з найвядомейшых мастакоў, які паходзіў з Беларусі — Марк Шагал (1887-1985) — сёлета адзначыў бы 135-годдзе. Прозвішча Шагал традыцыйна асацыюецца з двума гарадамі — Віцебскам і Парыжам. Aднак з біяграфіі мастака нельга выкідаць аршанскі след.
Упершыню прозвішча Шагал (замест Сегал) з’явілася ў дакуменце, які атрымаў дзед мастака ў 1861 годзе. Гэта адбылося акурат у Воршы. Каштоўны дакумент — пасведчанне, выдадзенае Аршанскай павятовай яўрэйскай вучылішчнай камісіяй меламеду (настаўніку) Давыду Ёселевічу Шагалу.
Дакумент знайшоў вядучы архівіст Нацыянальнага гістарычнага архіву Рэспублікі Беларусь Ігар Жыляеў.
Сёлета, праз шмат гадоў абяцанняў, у Віцебску пачалі рэстаўраваць Вялікую Любавіцкую сінагогу, у якую малы Марк Шагал хадзіў са сваім бацькам і якая месцілася хвілінах у 15 хады ад іхнага дому. Работы пачаліся ў жніўні. Сінагогу па вуліцы Рэвалюцыйнай рамантуюць на замову юдэйскай рэлігійнай абшчыны «Дом Ізраілеў».
