У Тэлеграме ёсць канал беларускай Вікіпэдыі, які аглядае найбольш папулярныя артыкулы, змешчаныя ў беларускай версіі праекту, на тарашкевіцы. Даволі нечакана ў рэйтынгу, апублікаваным у нядзелю, 11 чэрвеня, апынулася адна з вуліц Воршы.
Гэта вуліца Язэпа Драздовіча. Пра гэтым даволі дзіўна ўбачыць яе ў тройцы самых папулярных артыкулаў Беларускай Вікіпэдыі, бо гэта толькі накід артыкулу. Падрабязнасцяў пра вуліцу там ніякіх няма, за выключэннем таго, што яна знаходзіцца ў задняпроўскай частцы Воршы і атрымала сваю назву ў гонар Язэпа Драздовіча (1888–1954) — беларускага мастака, скульптара, этнографа, археолага і педагога.
Тым не менш, варта адзначыць тое, што артыкул пра наш горад трапіў на першыя пазыцыі рэйтынгу. Зрэшты, першае месца ў ім таксама дзівіць — гэта артыкул «П», пра літару абэткі.
