Якім жа быў краязнаўчы ліпень у нашым праекце «Гэты дзень у гісторыі?» Ды й не толькі ў ім. Былі ў ліпені й іншыя весткі з краязнаўчых палёў. Пра ўсё гэта — у нашай чарговай падборцы.
Найперш пра відэа, што мы выпусцілі на канале Orsha.eu на YouTube.
Як паўставаў палітычны беларускі рух на Аршаншчыне? Высветлілася, што з… абвестак у газеце. Менавіта яны спрыялі беларускаму палітычнаму жыццю, якое пачало віраваць, хоць агулам затармазілася ў параўнанні з некаторымі іншымі нацыямі.
У 1812 годзе Ворша на паўгады становіцца галоўным палітычным цэнтрам Еўропы. Тут жыве Напалеон, які ў тыя часы быў «суперзоркай». Што ён робіць у нашым горадзе? Прычым тут французскі літаратурны класік? І як французы знайшлі Аршанскае евангелле? Усё пра гэта ў наступным роліку. А сувязі Воршы з Францыяй немалыя! Ды ўвогуле пара адказаць на пытанне, што ж такое для Воршы 1812 год.
Чаму дзень народзінаў Воршы адзначаюць не ў той дзень? Гэтае пытанне таксама хвалюе ўжо шмат гадоў. Давайце разбірацца ў цэлым відэа на гістарычную тэму!
У наступным відэа гаворым пра ўнікальнае мастацтва, якое ўзнікла ў Воршы ў 17 стагоддзі і было вядомае далёка за межамі рэгіёна, нават у еўрапейскіх краінах. Яно ўзнікла ў 17 стагоддзі і ў 17 стагоддзі жа было знішчана. Што такое Флемская рэзь? Адкуль узялася? І хто ж знішчыў культуру?
Калі ў Воршы пачалі гуляць у футбол? На якім турніры быў важны поспех? Пра гэта — у наступным роліку, ужо на спартовую тэму, дзе таксама ёсць гістарычныя акалічнасці і пячатка таго часу.
Як наш горад кіраваўся Магдэбургскім правам? Дык што ў Воршы, ратуша ці калегіюм? А калі калегіюм гэта зусім не ратуша, дзе ж стаіць Аршанская ратуша? Давайце глядзець і даведвацца!
Як мы і пісалі на пачатку матэрыялу, не толькі відэазапісамі жыла Аршаншчына краязнаўчая ў ліпені летась. У нямецкім перакладзе раману Уладзіміра Караткевіча «Дзікае паляванне караля Стаха» знайшлі ўнікальнае нямецкае слова, датычнае Беларусі.
Акрамя таго, пра Караткевіча з нагоды 40-годдзя ягонай смерці ўспамінамі падзяліўся Зянон Пазняк. Палітык быў з пісьменнікам у добрых адносінах.
