18 лютага ў Оршы прайшла 5-я “Мазгабойня” – інтэлектуальная гульня, дзе каманды праяўляюць кемлівасць, эрудыцыю і здагадлівасць пры адказе на пытанні. На гэты раз удзел у гульні бралі 10 калектываў. Вечаровая сустрэча зноў скончылася вялікай інтрыгай і чарговы раз “скарыліся” некалькі рэкордаў, якія можна смела назваць гарадскімі, і проста “традыцый”.
У спорт-бары “Ліга”, як вядома, дзве залі, адна з якіх крыху меншая за другую. Паводле дзіўнай традыцыі, усе папярэднія чатыры гульні перамогу атрымлівала каманда, што сядзела за сталом у маленькай залі. У пятай, нарэшце, традыцыя была парушана. Пятая гульня зноў парадавала неверагоднай інтрыгай, а скончылася і наогул сенсацыяй. Не, сенсацыяй не ў плане выніковай тройкі – яна з перастаноўкамі захавалася з мінулай сустрэчы інтэлектуалаў, а ў тым, якім неверагодным чынам было разыгранае 1-е месца.
Пасля шасці тураў наперадзе пераможцы папярэдняга вечару “Памяркоўныя”, а іншыя фаварыты з каманды “Звяз” саступаюць ім цэлых 5 балаў! Нават нягледзячы на тое, што ў бліцы можна набраць максімум 14 пунктаў, не верыцца, што “звязаўцы”, маючы такое адставанне, адбяруць “золата” (а дакладней, вялікую бутэльку шампанскага аб’ёмам 1,5 літры) ў лідэра. Але ў бліцы адбываецца нечуванае: “Звяз” эфектна б’е рэкорд вырашальных тураў, набіраючы 14 балаў з 14 магчымых і заваёўвае перамогу! Акрамя таго, “Звяз” становіцца першай у Оршы камандай, якая выйграла 3 “Мазгабойні”! “Памяркоўныя” бяруць 2-е месца, а 3-е за “Нікай”, якая зноў дэманструе стабільнасць і сілу.
