У дзень 26-га лістапада споўнілася б 88 гадоў вядікаму беларускамі пісьменніку Уладзіміру Караткевічу. Штогод без выключэння гэтая дата святкуецца рознымі арганізацыямі і людзьмі. Прычым, варта з прыемнасцю адзначыць, Караткевіч — тая асоба, якая мірыць дзяржаўныя і недзяржаўныя арганізацыі. Славутага аршанца ўспамінаюць і чытаюць ягоныя творы перад публікай у бібліятэках, разнастайных цэнтрах, крамах нацыянальнай сімволікі, каля помнікаў. У Оршы шанавальнікі творчасці Уладзіміра Караткевіча сабраліся спачатку ў прыдняпроўскім парку, каб ускласці да помніка кветкі і прачытаць ягоныя творы. Затым кветкі ўсклалі і да гарэльефа, што знаходзіцца ў пачатку вуліцы Леніна. Аднак падобнымі традыцыйнымі акцыямі справы не абмежаваліся. Адбылося ўсталяванне шыльды на вуліцы Караткевіча, 19. Гэта звычайная шыльда з адрасам, аднак выкананая на беларускай мове. На дадзены момант яна пакуль адзіная, выкананая на роднай мове на дадзенай вуліцы, ды і адна з нешматлікіх беларускамоўных ва ўсім горадзе.
Акрамя таго, увечары 26-га лістапада ў Гарадскім цэнтры культуры Оршы адбыўся канцэрт аркестра Міхаіла Фінберга. Салістамі выконваліся песні на вершы Уладзіміра Караткевіча, а ў залі быў аншлаг.
У Віцебску, дзе стаіць яшчэ адзін помнік Караткевічу, таксама ўскладалі кветкі і чыталі вершы ля помніка. Прычым віцябляне пакінулі аркушы з вершамі Караткевіча каля помніка, каб тыя, хто будзе праходзіць міма, прачытаў ягоныя радкі і натхніўся ці паразважаў пра Радзіму.
Таксама віцебскі Арт-паб "Торвальд" зрабіў 26-га лістапада днём памяці Караткевіча, быў паказаны аўтабіяграфічны фільм, а пасля стужка "Хрыстос прызямліўся ў Гародні".
Ушанавалі пісьменніка кветкамі і ў Менску, дзе стаіць помнік маладому Уладзіміру Сямёнавічу. Акрамя таго, у сталіцы выпусцілі ўнікальныя кубачкі з беларускімі пісьменнікамі, у тым ліку з Уладзімірам Караткевічам. Пастаралася "Арт Сядзіба".
