Ужо самы пачатак 2018 года, яго першы тыдзень выдаўся ўраджайным на заўважныя падзеі. А найпапулярнейшай інфармацыяй за студзень мінулага года стала навіна пра недабудаваны, згодна з ранейшымі планамі, гандлёвы цэнтр на Чаромушках, вакол якога ўжо зламала нямала дзідаў аршанцаў. Бальніцу таксама будавалі з парушэннем тэрмінаў, але ўсё ж здалі ў эксплуатацыю, хай і з вялікімі праблемамі і недапрацоўкамі. Таксама было дадзена абяцанне стварэння працоўных месцаў у лагістычным цэнтры "Брэміна-Орша". Але, як звычайна гэта на Аршаншчыне перыяду Лукашэнкі бывае, цяпер гаворка ідзе не пра працоўныя месцы, а наогул, ці дабудуюць цэнтр, які мусілі дарабіць у канцы 2018 года, але сарвалі тэрміны.
Студзень 2018-га быў, на жаль, насычаны і злачынствамі з выкарыстаннем халоднай зброі. У прыгарадным аўтобусе на тэрыторыі Талачыншчыны 1-га студзеня адбылася панажоўшчына, а перад праваслаўнымі Калядамі п'яны бацька нажом забіў сына. Следства вакол забойства бітамі землякоў-беларусаў на заробках у РФ атрымала новы паварот. 11-га чысла ў Оршы адбылося новае забойства з выкарыстаннем нажа. Акрамя таго, бытавая сварка ледзь не прывяла да выбуху дома № 39 на праспекце Тэкстыльшчыкаў, а жыхар Дуброўны дабіваўся прыняцця наі працу ў ДАІ з гранатай у рукох.
Выпускніца Смалянскага каледжа ў гэтым месяцы паскардзілася на тое, што яе звольнілі па месцы размеркавання і прымушалі плаціць грошы за навучанне. Адкрыццё новага бара "Матор" у раёне Ільнокамбіната выклікала вялікую зацікаўленасць аршанцаў. А матэрыял пра праблемы аршанскага футболу выклікаў вельмі гарачыя спрэчкі ў каментарох пад артыкулам.
Акрамя таго, у Оршы адбыліся важныя ў жыцці горада падзеі. Спорткомплекс "Алімпіец" прыняў фінальны матч Кубка Беларусі па міні-футболе, і менавіта аршанскі клуб "Вітэн" узяў пачэсны трафей!
Шмат шуму нарабіў канцэрт Сержука Доўгушава (эксклюзіўнае інтэрв'ю нашаму сайту) і Алеся Ясінскага. Кіраўніца аддзелу культуры райвыканкама Ганна Святлова тройчы забараняла канцэрт вядомых музыкаў. Гэта прымусіла нас апублікаваць "Спіс Святловай" — гурты, спевакі, мастакі, якім не дазволілі выступіць ці выставіцца ў Оршы праз "ідэалагічны" фільтр ці проста з прычынаў, вядомых толькі самой Святловай. Сітуацыя выклікала велізарны рэзананс далёка па-за межамі Оршы і нават па-за межамі Беларусі. Музыкі, якія спакойна выступалі ў Празе, Варшаве, Віцебску, у Оршы раптам сустрэлі моцнае супрацьстаянне ідэолагаў і цэнзараў, хаця прывезлі праграму... па Караткевічу. Мадэратары на нашым сайце не паспявалі публікаваць каментары, якія паступалі на сайт ад абураных аршанцаў.
